Equipamento: Cidade da Cultura de Galicia

Titularidade e xestión

Fundación Cidade da Cultura de Galicia

Servizos

Cafetería, tenda, aparcadoiros

Prezo da entrada

Entrada á Cidade da Cultura: libre e de balde

Entrada ás exposicións temporais do Museo Centro Gaiás: Xeral: 4€ | Reducida: 2€ | Colectivos especiais: de balde

Modo de visita

Visita guiada ao complexo: fins de semana e festivos. De balde. Sen reserva previa.

Saída: desde o Punto de Información, ás 11:30 e ás 17:30.

Visitas didácticas á exposición: de martes a venres. De balde, previa reserva en visitasdidacticas@cidadedacultura.org.

Actividades non permanentes

Exposicións temporais, cursos, conferencias, concertos, actividades infantís....

Espazos

Museo Centro Gaiás

Chamado a ser un referente arquitectónico do século XXI, o Museo Centro Gaiás é un dos edificios máis singulares e con máis posibilidades de uso da Cidade da Cultura, que aspira a converterse no centro expositivo de referencia de Galicia.

A espectacularidade da súa fachada, os case 43 metros de altura e os seus máis de 16.000 metros cadrados de superficie permítenlle ao Museo Centro Gaiás despregar unha oferta de actividades formativas e de divulgación que o converten nun centro activo e en continua renovación.

O Museo Centro Gaiás conta cunha superficie expositiva de 6.600 metros cadrados, dividida en tres plantas, nas que acolle exposicións temporais de fondo calado e instalacións que pola súa envergadura non poderían exhibirse noutros centros culturais de Galicia.

Biblioteca e Arquivo de Galicia

O edificio da Biblioteca e Arquivo de Galicia alberga estas dúas institucións independentes.

Cabeceira do sistema de bibliotecas galegas e do patrimonio documental da nosa comunidade, a Biblioteca de Galicia reúne, conserva e difunde todo o patrimonio bibliográfico da comunidade e facilita o seu acceso, xa sexa de forma presencial ou virtual.

O Arquivo de Galicia, como cabeceira e de referencia do sistema de arquivos da comunidade, a súa misión é a de recibir, custodiar e poñer a disposición dos cidadáns todos aqueles documentos públicos ou privados en calquera tipo de formato que, polo seu valor, precisen ser conservados. Ademais, o Arquivo de Galicia custodia os documentos emanados das actividades da Xunta de Galicia e os seus órganos dependentes, asegurando o seu acceso aos cidadáns.

Cunha ampla sala de lectura, unha potente rede wifi e un servizo de consulta dixital, a Biblioteca e Arquivo de Galicia ábrese aos usuarios como zona de estudo pero tamén como lugar para acoller diferentes eventos: desde concertos a proxeccións audiovisuais ou obradoiros. Unha función que se complementa co auditorio do que dispón o edificio, cunha capacidade para 120 persoas.

Centro de Emprendemento Creativo

Concibido como un centro especializado na incubación de empresas culturais e creativas galegas, o Centro de Emprendemento alberga nas súas instalacións a sede da Axencia Galega de Industrias Culturais (Agadic), organismo autónomo dependente da Xunta que ten por obxecto o impulso e a consolidación do tecido empresarial no sector cultural galego, traballando na procura dunhas industrias culturais dinámicas, competitivas e innovadoras.

Conta cun espazo de coworking "Emprende Cultura Gaiás", un showroom e un viveiro de empresas.

Centro de Innovación Cultural

O corazón dixital da Administración galega ten o seu lugar o no Centro de Innovación Cultural, que acolle os departamentos de xestión e loxística da Fundación Cidade da Cultura de Galicia e a sede da Axencia para a Modernización Tecnolóxica de Galicia (Amtega).

Cunha superficie de 7.500 metros cadrados, o edificio consta de sete andares que albergan oficinas, unha cafetería para o persoal, dúas salas polivalentes e un salón de usos múltiples duns 500 metros cadrados para a realización de eventos.

Torres Hejduk e contorna

Inspirado na zona histórica de Compostela, a cidade deseñada por Peter Eisenman no Gaiás artéllase a través de rúas, soportais e unha gran praza central que comunica todo o complexo, converténdose nunha cidade con vida propia. Nesta contorna, as Torres Hejduk merecen unha mención especial. Foron deseñadas en 1992 polo arquitecto John Hejduk (Nova York, 1929-2000) como torres botánicas para o parque compostelán de Belvís, que non se chegaran a realizar.

Cantina

Unha taberna característica do rural galego trasladada a este moderno e espectacular complexo. Esta é a proposta que o estudo Nómada aplicou na Cantina, que recibiu o máximo galardón nos prestixiosos Restaurant & Bar Design Awards co que se recoñece ao restaurante mellor deseñado en todo o mundo.